كالعادة بكتب بكتب وأنا زهقان , شكله مرض وراثى ولا أيه !! مع أن أبويا ما شاء الله على حسب علمى واللى كنت بشوفه انه كان على طول بيضحك , يلا ما علينا حنتكلم النهاردة يا ولاد يا شاطرين عن الفتيٌ , الفتيٌ اللى تقريبا مرض مصرى أصيل , بيتولد معانا من أول يوم نيجي فيه الدنيا , محدش عارف دا فى الجينات المصرية , السبب الرئيسى فيه مية الشرب , أو الُه الفتيٌ عند الفراعنة فتُاميس , كل دي فتوُات فتيتها وأنا قاعد دلوقتي , الحمد له على نعمة المصرانة , أحنا مبنغلبش يعنى , أصلا عيب أقول معرفش , أزاي معرفش وأنا مصرى !! دا الفتُى دا أحنا اللى أخترعناه , ماركة مصرية خالصة مسجلة , يعنى بتاعنا أحنا المصريين , أحنا اللى دهنا الهوا دوكو يا جدع , دوكو !! دوكو أيه وكلام فارغ أيه !! مينفعش ندهن الهوا بالدوكو عادى كده  , دا له فُرش معينة مش بتتباع غير في أمريكا , وأوعى حد يضحك عليك ويبيع لك واحدة صينى ويقولك أنها أصلى , أدي كمان فتوى على الماشي , طب وبعدين !! انا لازم اتعالج , مينفعش أفضل أفتيٌ كده في كل حاجة وكل موضوع , طب مفيش دكتور يكون بتاع فتيٌ كويس !! طب أنا لو سألت حد على دكتور ممكن يكون الحد دا نفسه بيفتيٌ , ومش بعيد الدكتور نفسه يكون هو كمان بيفتيٌ , وساعتها حالتي تدهور أكتر من كده , دا أنا ممكن بعد كده أفتي وأنا نايم , أفتيٌ وأنا صاحي , أفتيٌ وأنا ماشي , أفتيٌ وأنا باكل , أفتيٌ مع كل نفس داخل وكل نفس طالع , طب يعني حعيش أزاي من غير ما أتنفس !! لأ .. أنا لازم أتنفس , طب أيه الحل ؟ مفيش غير أني أقعد ساكت , أه أنا حقعد ساكت , حتكلم في اللى أفهم فيه , لو معرفتش مش حقول عدس , حقول معرفش , ححاول أبقى أول واحد ميفتيش , المفروض اصلح نفسى من بعد الثورة , عشان البلد مش ناقصة , كفاية الناس اللى كلها بقت بتفتى في السياسة ,دا أنا جت عليا فترة  كنت مقتنع فى الست سنين اللى فاتت أن مصر فيها 80 مليون محلل كروى ,أما بعد 25 يناير بليل "سبحان الله" اتحول ال80 مليون هما هما لمحللين سياسين , طب والله عيب علينا , حاجة زي السياسة دى ليه جامعات وأستاذة وناس متخصصة , عيب نفضل نفتيٌ في حاجة مش بتاعتنا , حاجة مش بنفهم فيها , ونفضل ننقل لبعض أخبار من غير مصدر موثوق منه او شاهد عيان او حد متخصص , مش كل واحد يسمع كلمة من حد يصدقها , خلاصة الموضوع أنا مش حروح لدكتور خلاص , أنا حعالج نفسى بنفسي , انا لقيت علاجى , أما مش حعرف أو حبقى مش متأكد من حاجة حقول معرفش , أنا معرفش.

اول مرة اكتب في حياتى ... مش عارف اقول ايه ولا اكتب عن ايه , عُمر فكرة الكتابة اصلاً ما جت على بالى , دا أنا حتي خطى وحش جداً من وأنا صغير , حعمل ايه طيب !!, ربنا عاوز كده , طبعاً دا سبب كتير منا بيصبروا بيه نفسهم وأنا واحد منهم , بس يلا حنعمل ايه بقى , المهم .. كنا بنقول ايه ؟؟ أه أه .. اني أول مرة أكتب , طب ناخدها واحدة واحدة من الاول كده .. أولاً انا اتكلم عن نفسي كده بأختصار .. انا شب مصرى ملوش في أي هوايات , عايش عشان نفسه يدوب خلص كليته وطفش من البلد "البلد اللى كانت قبل 25يناير" بقعد على النت مش أقل من 12 ساعة فى اليوم طبعا مش حتستغرب انى بقعد كتير , بعانى من فراغ كبير اوي حتي في عز ما أنا مشغول , وطبعا من منطلق أنى بضيع نص عمرى على النت بمعدل نص يوم كل يوم , عندى اكونت -أقصد حساب- على الفيس بوك وما أدراك ما الفيس بوك , والاكونت -قصدى الحساب- اتقفل وعملت واحد جديد, بس طبعا مشكلة الفراغ والملل اللى بتطاردنى في كل لحظة بتنفسها سيطرت عليا كالعادة, وبما أنى بنى أدم ضعيف استسلمت للملل كالعادة ,وكانت المفاجأة ..... أنى مليت من الفيس بوك ,أيوا الفيس بوك , مكنتش مصدق نفسى , طب حعمل ايه على النت , حملي فراغى في أيه !! الحقونى يا عالم أنا كده حضيع !! وجالى الالهام أنى ابتدي أدور على حاجة تانية اشغل بيها فراغى ولأنى واحد من الناس كل علاقاته بمجال الرياضة هو الفرجة على المتشات , قلت أدور على النت وأهو يبقى مروحتش بعيد يعني , عمال اسمع كلمة كده وأقرأها كل شوية , كلمة مألوفة علي ودانى , تويتر .. تويتر .. وجدتوهااااا , انا لازم يبقالى اكونت على تويتر , كل البرامج وقنوات الاخبار بتقول تبعونا علي تويتر وفيس بوك , طب أنا أزاي نص عمري بيضيع على النت ومعنديش اكونت على تويتر !! وفى لحظات دخلت علي جوجل وكتبت تويتر , مانا كتبتها اي حاجة كده عشان مش عارف بتتكتب أزاي بصراحة , وعملت الاكونت , الغريب أنى طلع أصلا عندى اكونت عليه من اكتر من سنة , الواحد عمره مكنش بيضيع على الفاضى الحمد لله , ودخلت عالم تويتر , اشوف دا كاتب ايه , ودي صورتها حلوة , ماهو فرح بقى , ومحدش يعرفني , اعمل سيرش أسامى صحابى , مش لاقى حد!! , طب وبعدين , ما أنا مينفعش أفشل على تويتر , مش حباً فيه , لأ .. عشان مرجعش للفيس بوك والملل من جديد , يا خوانا دانا مكنتش اعرف يعنى ايه هاشتاج , المهم .. الطش يمين فى شمال , بدأت أفهم الموضوع ماشي أزاي , وأفتكرت مثل تقريبا تأليف حد مش معروف بيقول " ناس بتوصل ناس" طبعا هو فى توتير" ناس بتتابع ناس" , ها ها فهمت الدنيا ماشية أزاي , طب ايه موضوع البلوجرز قصدى المدونين دا !!! اصلاُ يعنى ايه مدون !! طب المدون دا شكله عامل أزاي !! زينا كده عنده ايدين ورجلين !! وبعد فحص وتمحيص اكتشفت أن المدون دا بنى أدم عادى جداً , طب وبعدين .. !!مفكرتش كتير قلت لازم ابقى بلوجر قصدى مدون , أنا مش أقل منه في حاجة , بالعكس دا انا اكيد فاضي أكتر منه دا غير إنى بعالج نفسى من الملل وقررت أكتب , طب حكتب أيه؟؟ طب عن أيه؟؟ مش عارف بس أنا حكتب وخلاص , وأديني كتبت , عملت اللي انا عاوزه , انا بقيت بلوجر ,عملت اللى أنا عاوزه , الفكرة كلها من الكلام الكتير دا , متستسلمش للملل , يا راجل دا كان شعار ميلودى لأكتر من سنة انها بتتحداه , وعاوزة تتخلص منه , اعمل اللى انت عاوزه في الوقت اللى انت عاوزه بالاسلوب اللى انت عاوزه , بس فكر قبل ما تعمل اي حاجة في العواقب اللى حتحصل بعد كده عشان متندمش , عواقب !! انا قلت عواقب !! ايه الكلام الكبير اللى انا بقوله دا !! طب والله انا كده بقيت بلوجر قصدى مدون